Nchini Tanzania kilimo kimeendelea kuwa uti wa mgongo wa uchumi wa watu wengi kwani asilimia kubwa ya wakazi hujishughulisha na shughuli za kilimo. Lakini upatikanaji wa mbolea zisizo na kemikali imeendelea kuwa changamoto na hata zile zilizopo kutokidhi mahitaji ya soko hivyo kutegemea uagizwaji wa mbolea hizo nje ya nchi ambazo hufubaisha mnyororo wa uongezaji thamani na kupelekea kupanda kwa bei ya bidhaa zifikapo sokoni.

Kwa kutambua umuhimu wa kilimo kwa uchumi wa Taifa, Serikali kupitia Shirika lake lenye jukumu la kuchochea ukuaji wa uchumi na maendeleo nchini, Shirika la Taifa la Maendeleo (NDC), imeona haja ya kukiongezea uwezo kiwanda chake, Tanzania Biotech Products Limited (TBPL) cha Kibaha-Pwani kuzalisha mbolea zisizo na kemikali ambazo zitasaidai kupunguza changamoto ya upatikanaji wa mbolea zenye ubora na zisizo na madhara kwa watumiaji.

Leo, Serikali kupitia Waziri wa Mambo ya Nje na Ushirikiano wa Afrika Mashariki, Balozi Liberata Mulamula pamoja na Naibu Waziri mwenye dhamana ya Uwekezaji, Viwanda na Biashara, Mhe. Exaud Kighahe wameshuhudia Hafla ya Utiaji Sahini Mkataba wa Uzalishaji Mbolea na Viuatilifu Hai vya kuangamiza wadudu dhurifu katika mazao hasa pamba na mboga katika kiwanda cha kuzalisha bidhaa za kibaiolojia, Tanzania Biotech Products Limited (TBPL) cha Kibaha mkoani Pwani kilicho chini ya Shirika la Taifa la Maendeleo (NDC).

Hafla hiyo iliyofanyika kiwandani hapo imehudhuriwa na ujumbe kutoka Serikali ya Cuba ambao ni wadau katika uzalishaji wa bidhaa za kibaiolojia, Timu ya Majadiliano ya Serikali iliyokuwa ikiongozwa na Naibu Katibu Mkuu Ofisi ya Rais TAMISEMI anayeshughulikia Afya, Dkt. Grace Magembe, wafanyakazi wa NDC na TBPL.

Akizungumza katika hafla hiyo Balozi Mulamula amesema; amefarijika kuona ushirikiano na uhusiano baina ya Tanzania na Cuba ukiendelea kukua na kukuza diplomasia inayojikita katika biashara na uwekezaji.

Pia ameeleza kuwa Serikali imeshuhudia utiaji sahini wa mikataba miwili. Mosi, wa uendeshaji wa kiwanda pamoja na mkataba wa kuangalia namna teknolojia iliyoletwa na Cuba itasaidai kuzalisha viuatilifu vitakavyotumika kuzalisha mbolea zisizo na kemikali pamoja na dawa za kibaiolojia za kuangamiza wadudu dhurifu.

Ikumbukwe kuwa lengo la ujenzi wa kiwanda hiki lilikua kutokomeza malaria nchini na Afrika kwa ujumla. Kauli hii inaungwa mkono na Naibu Waziri mwenye dhamana ya Uwekezaji, Viwanda na Biashara, Mhe. Exaud Kighahe ambaye amesema Serikali ya Awamu ya Sita imeona ni vyema kupitia diplomasia ya kiuchumi kukubalina na Cuba kuongeza mkataba wa kuzalisha viuatilifu visivyo vya kemikali.

“Viuatilifu hivi ni vya kibaiolojia, havina madhara hasi kwa watumiaji,” amesema Mhe. Kighahe.

Amekazia kuwa uzalishaji wa mbolea zisizo na kemikali itasaidia kukuza Sekta ya kilimo kwa kuzalisha mazao yasiyo na kemikali hivyo kulinda afya za watumiaji.

Nae Mkuu wa Mkoa wa Pwani, Mhe. Abubakari Kunenge amesema kuwa uwepo wa kiwanda hicho katika mkoa wake kinawasaida vijana wa Kitanzania kuongeza ujuzi wao kutokana na teknolojia mpya inayoletwa na Wacuba, licha ya hilo ameeleza kuwa kilimo cha kutumia mbolea zisizo na kemikali kina soko kubwa.

“Kilimo hai kina soko kubwa duniani na tukipata bidhaa hizi nchini tutauza kwa bei ya chini,” amesema Mhe. Kunenge.

Uzalishaji wa mbolea za kibaiolojia utasaidai kuinua kilimo cha Tanzania na kukifanya kuwa cha kisasa zaidi, kama alivyoeleza Mkurugenzi Mwendeshaji wa Shirika la Taifa la Maendeleo (NDC), Dkt. Nicolaus Shombe.

“Hizi ni mbolea za kibaiolojia zinazo zalishwa na bakteria wanaotoka kwenye udongo na ni bakteria rafiki,” ameeleza Dkt. Shombe. Licha ya hilo amekazia kuwa uhitaji wa soko ni mkubwa na wanatarajia uhitaji kuongezeka kwani watu wengi wamekua wakitumia bidhaa zinazo zalishwa na mbolea za kibaiolojia.